“Risiko kula awrat: menawi duraka, malik dados jambu mété… Héhéhé,”
Mengkono guyonané Lik Blontank nalika ngécé aku amarga aku pancèn luwih tuwa lan wis miwiti krépo dhèyèk-dhèyèk, kathik tambah lalèn — bar saka kulon kèlingané malah ngétan. Pokoké wis ora bregas lan ora permana.
Lha ananging sapa to bocah jaman saiki, warga kutha, sing isih ngerti jambu mété? Yèn mété mesthi ngertiné, lha yèn jambuné? Yen uwohé ngerti durung mesthi tau meruhi wité.
Jambu mété (Anacardium occidentale) utawa jambu monyèt (dudu jambu munyuk) iku dianggep béda saka jambu liyané, umpamané jambu wèr utawa jambu air (wong Inggris ngarani “water apple“; Syzygium samarangense).
Jambu mété nduwèni sirah utawa endhas ing ngisor. Sirah utawa isi iku sing dadi cemilan. Amarga sirahé ing ngisor mulané jambu mété kerep kanggo ngumpamaaké bocah kang kuwalat saka durakaning marang wong tuwa. 
Lha sakjané, miturut ahli ilmu hayat, sing kaaran uwoh iku ya météné, wijiné. Sing kaya daging uwoh iku mung bongkot utawa tatakan kembang kang dadi abuh ananging ora nganti mbledhos.